Papali ea mojaho oa lipere ea ntlafala

Raliphatlalatso oa mokhatlo oa mojaho oa lipere monghali Mojaki Mojaki o hlalosa hore papali ea mojaho oa lipere ea hola ka hare ho naha.

sdr
Monghali Mojaki Mojaki

O boletse joana e le ha ho hlokomeleha hore mojahong oa Mafeteng oa beke e fitileng ha ho ka ba le likhohlano tse mona tse etsahalang hangata.

O itse ba hlile ba sebetsana le boemo moo haholo. Empa a supa hore ka nako e telele papali ena e ne e bonahala e le ea bochaba.

A re beng ba lipere ba ne ba sitoa ho utloisisa hore joale e se e le tlholisano eo ho lebeletsoeng hore ba hape chelete. E le hore ba lokela ho sheba peiso ea lipere ka leihlo le leng.

A re haesale joale ba fetola papali ena ho bile le lithupelo tse ngata tseo ba ileng ba litšoara. Ka hona li kentse letsoho kutloisisong ea papali ena.

A re taba ea hore mojahong o mong le o mong ho lefuoa lipere tse hlano, ‘me ke mejaho e tšeletseng kaofela, taba ena e bolela hore batho ba 30 bophelo ba bona bo fetohile hobane ho na le seo ba tla sefumana.

A re batho ba tseba ho lefella bana sekolong, ho fepa lipere le mabaka amang ao motho a ka etsang ka chelete. Hape ho na lipere tse ling tse rekisoang linaheng tse ling, li bile li sebetsa hantle mabelong a fapakaneng.

Monghali Mojaki a bontša hore haeba ba ka itlhopha hantle ba tla tseba ho sebetsa hantle.

A re taba engoe e bonahetseng e kenya letsoho ho nyahamiseng batho ke hore liphetoho li etsoa metsotsong ea ho qetela, ebe ho so thoe fela chelete ha eo mojaho ha o na ho tsoelapele.

A bontša hore empa haeba lethathamo la liketsahalo le ka hlaka hantle la saloa morao ha ho liqholotso tse kang tsena tse ka bang teng.

A toboketsa hore sepheo ke hore ba kenele mejaho ea Botswana, Eastern Cape, Pieter Maritzburg le Dundee.

A re oa Botswana o tla tšoaroa ka paseka.

Ha a hlalosa hore na lipere tse ipabolang ke lifeng, o itse ke Patang ea monghali Motšoane Fako e mathang bolelele ba 1, 400 le 1.600 meters. A re mejahong ea trepele teng Summer Time ha ea makoa, eona ke ea monghali Sello Rasenya.

Aza ara, Hypothemic, Blue Torch tsa monghali Mofosi, le tse ling li ea ipabola ka mehla, bonyane li hlaha ho tse hlano tsa pele e be li tšoasa letho.

A bontša hore pere e sebetsa hantle ho ipapisoa le lintho tse ngata joalo ka moo lijahelang teng (Panta), e fepiloe joang le tse ling. A re tse ling li matha hantle lehlabatheng ha tse ling li sebetsa hantle moo ho nang le joang.

Monghali Mojaki o tsoetsepele ho bolela hore ba sebelitse hantle mojahong oa Mafeteng oo ka oona ho ne ho tlotloa letsatsi la tsoalo la mofu mofumahali ‘Mamohato.

A supa hore hore ke nnete ho bile le phoso e sa bakoang ke motho, moo mochini oa moo lipere li tlohang teng o ile oa sitoa ho bula liheke kaofela, ka hona lipere tse ling tsa sitoa hotsoa.

Mojaho ona o tla tsoelapele ka Sontaha sa la 10 Hlakola hona Mafeteng joalo ka ha ho ne ho reriloe.

Mongahli Mojaki o supile hore ka moso ba lokela hore ba o hlahlobe hangata pele lipere li matha. Hape ba bone hore ho ba le motho ea tla be a tšoere lesela a eme moo e tla re haeba ho ka ba le liphoso a thibe lipere.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close