Mokhatlo oa baqolotsi o tšoengoa ke LeFA

Mokhatlo oa baqolotsi ba lipapali oa Lesotho (LSRA) o tšoenyehile ke ka mo mokhatlo oa papali ea bolo ea maoto (LeFA) o sebetsang litaba tsa bona ka teng.

Sena se hlaheletse polelong e ntšitsoeng ke LSRA ka Moqebelo (17.07.21) o fetileng.

Hoea ka polelo ena LeFA e eme thabeng hore ba hloka ho kene baqolotsi ba tšeletseng fela ka lebaleng, ha LSRA eona e batla ho kene palo e fetang eo.

Monghali Tebalo Lebajoa

Ka morao ho hore LSRA e ntše polelo moqolotsi oa rona o ile a phura leshoetla le raliphatlalatso monghali Tebalo Lebajoa.

Monghali Lebajoa o hlalositse hore LeFA e lomme bebebe hore papaling ea bolo ho kene baqolotsi ba tšeletseng ka lebaleng.

“Ka hona taba ena e re rahile maling ampa hobane baqolotsi ba ea mabaleng ho ea etsa mosebetsi oa bona o kenyeletsang ho ngola, ho phatlalatsa le ho nka litšoantso e sitana le tse ling”, ho rialo monghali Lebajoa.

A re ho theola palo hona ho hanya baphatlalatsi le baqolotsi ba litaba tsa lipapali.

Ba ile ba atamela LeFA ho e hlokomelisa hore palo ena e tlase haholo ho latela hore ho na le litsi tsa bophatlalatsi tse 46 ka hara naha, ‘me ke baqolotsi ba 52 bao e leng litho tsa bona tse sebetsanang le lipapali.

LeFA e hanne ho lumellana le LSRA bare bona bonyane ba ka nyollela palo ho 10.

Palo ena ha e na ho akofisa tlhoko ea LSRA hohang ho latela monghali Lebajoa.

O bontšitse hore e le mokhatlo ba ka lakatsa hore ho lumelloe palo e holimo ka moo ho ka khonehang.

“Bonyane palo ea 25 e ka utloahala, eseng tšelela ena e boleloang ke LeFA”, ho bolela raliphatlalatso oa LSRA.

Ba ile ba boetse ba atamela NACOSEC, ‘me eona e bontšitse ho se na bothata empa e ka nyolohela ho 20 eseng ho feta moo.

Monghali Lebajoa a toboketsa hore bothatanyana bo teng ha joale ke hore palo ena ha e so kene ka hara molao hobane e lokela hore e be molao pele e sebetsa.

O tsoetsepele ho supa hore qholotso engoe ke hore baqolotsi ba lumelloa ho kena lebaleng ho fihlela ka 12:30.

Taba ena ke qholotso e tšabehang hobane baqolotsi ba tloha libakeng tse hole hokenyeletsa le Mafeteng le tse ling moo ho nang le litsi tsa bophatlalatsi.

Ka hona a hlahisa hore bonyane ha ho ka koaloa likhoro ka hora ea pele ho ka ba betere haholo.

Moqolotsi oa LSB o ile a ja lekomo le ralipahatlalatso oa komiti e tsamaisang lipapali tsa liki e kholo Lesotho monghali Qamako Mahao.

O hlalositse hore nako ena ke eo ka eona lipapali ho kenyeletsa ena ea bolo ea maoto li hlokang bophatlalatsi bo matla ho latela seoa sena sa COVID 19.

Mabaleng a bolo ea maoto ha ho lumelloe ba tho ba ilo shebella papali ka hona litsi tsa bophatlalatsi li tla tseba ho ba hasetsa lipapali tse joalo ho sechaba.

“Haeba ho na le nako eo lipapali lihlokang bophatlalatsi ke eona ena eo batho ba sa lumelloang ho kena ka mabaleng”, ho toboketsa monghali Mahao.

“Haeba mabala a ka tlala baqolotsi le baphatlalatsi ba litaba tsa lipapali, ha ho be joalo. Ka hara naha ho na le litsi tsa li ea-lemoea tse ka bang 20 e leng hore lenane la 25 le lona le fokola haholo”.

O tsoetsepele ho supa hore setsi se le seng sa lipapali ha sea lebelloa ho romella motho a le mong lebaleng.

E mong ha ngola e mong o nka lifoto. Mohlala o mong ke hore lekhotla la bophatlalatsi la Lesotho (LNBS) e na le liea-le-moea tse peli, television, koranta, le tse ling.

E le hore palo ea tšelela kapa leshome e ka fella ho LNBS fela, e be litsi tse ling ha li na batho ba li sebeletsang.

Taba engoe e hlaheletseng ke hore mokhoa oa ho kena oa baqolotsi le baphatlalatsi ka lebaleng ha oa hlaka.

Joale potso ke hore na lenane le le kalonyana ho tla kena bafeng ho sale bo mang kantle.

Monghali Mahao o hlakisitse hore sepheo sa hore batho ba sekene lebaleng ka bongata ke ho qoba tšubuhlellano e le ho thibela tšoaetso ea COVID 19.

“Ha ke so bone baqolotsi ba entse tšubuhlellano joalo ka mela e melelele eo ho ka bang le ho tšoha hore tšoaetso e ka akofala”, ho phethela monghali Mahao.

LSB e lekile ka hohle ho fumana lehlakore la LeFA le NACOSEC empa e ile la teea kalala, empa haeba litsi tseo li ka hlahella ha ‘mela o ntse o puta litaba tsa bona li tla amoheloa li fitisetsoe sechabeng.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close