Papali ea bolo ea maoto ke tlholisano

Sehlopha sa Lesotho Defence Force (LDF)

Ka nako engoe libapali tsa manthla tsa sehlopha ho etsahala hore li seke tsa bapala hantle hobane ba tseba hore ke libapali tse tšetjoang ba tla fumana monyetla ka lebaleng.

Ana ke matsoe a mokoetlisi oa sehlopha sa mapolesa a Lesotho se tsebahalang ka lebitso Semunye.

 Monghali Seepheephe “Mochini “Matete o boletse sena ha a phura leshoetla le moqolotsi oa Lesotho Sport Blizz (LSB) ka mora tlholo ea sehlopha ka ho mamola masole ka ntlha e le ngoe ho lehe (1-0) ka Moqebelo oa mafelo a beke e fitileng.

“Libapali tse tšeptjoang ka bomalimabe li ile tsa fumana likotsi, ha se seng se bile le kotsi empe haholo”, ho bolela Mochini.

Ka hona o ile a lokela ho bapalisa libapali tse ncha tse sireletsang.

“Ke ile ka ba bolella hore bolong monyetla oa fitla o be o fete, haeba ba ka sebelisa monyetla oo ba u filoeng ba tla lula ba le ka lebaleng”, a tsoela pele mokoetlisi.

Lipapali tsena tseo Semunye e lihlotseng kaofela e ne e le tsa libapali tse bapala morao ba bacha kaofela, e sitana le boikitlaetso ba libapali kaofela.

Ka hona mokoetlisi o supile hore ha libapali tse tsoileng likotsi li fola o tla lebella hore ba itšupe le bona hore ba lokela ho kena ka lebaleng kapa che, hobane bolo ea maoto ke tlholisano, ea sebetsang ka thata o fumana moputso.

A bontša hore taba ena e nyolotse morolo oa sehlopha haholo, ‘me ho theohetsoe ka matla.

Mochini a supa hore ha ba bapala le lihlopha tse matla meralong ea bona ba sheba hore na ke hokae moo ba nang le matla kapa bofokola teng, le sehlopha seo ba tobaneng le sona ba sheba litaba tse joalo.

Joale ba nka monyetla moo sehlopha sa lireng se fokolang teng.

“Ha e le LDF ke sehlopha se matla bohareng ba lebala, ka hona re ile ra ba tima sealolo eaba ba ea ferekana ra nto ba hlaba ntlha”, a tsoela pele mokoetlisi oa Semunye.

A re e itse ha ba utloa khatello eaba ba se ba bapala libolo tse holimo.

Raliphatlalatso oa Semunye monghali Mosiuoa Lekhooana o hlalositse hore ha ba bapala lipapali tsa lihlopha tse kholo joalo ka LDF libapali li ba morolo.

“Ha se le hore hobe le lintho tse mohlolo tse etsuoang ho libapali, empa li ba morolo ha li teana le lihlopha tse matla tse kang LDF le tse ling ebe li ea li tlabola”, ho rialo monghali Lekhooana.

Lihlopha tsa mapolesa le masole ha li teana ka lebaleng ho qoba lerole ka mehla, ho sa tsotellehe hore se seng sa lihlopha se hula ka falese kapa che.

Mantsoe ana a boletsoe ke mookameli oa liphatlalatso oa sehlopha sa LDF monghali Donny Ntakha.

“Re bile le menyetla e metle eo re e fumaneng empa ra seke ra e sebelisa ho hlaba lintlha, empa Semunye eona e tsebile ho sebelisa monyetla oa eona”, ho rialo monghali Ntakha.

“Ha re na pelaelo ea hore re hlotsoe, hoa rona ke ho khutlela morao re lokise liphoso tse bileng teng”.

O supile hore sehlopha sa habo se ne se bapala hantle empa sa sitoa ho hlaba lintlha.

A tsoela pele hore ba tla teana le sehlopha sa Manonyane mafelong a beke ena, ‘me ba tla be ba itlhophile hantle.

Pele ho papali ena ea Semunye  sehlopha sa LDF se ile sa tloejoa ke CCX ka lintlha tse peli ho e le ngoe (2-1), ha pele ho moo ba ile ba poqoa ke Matlama ka ntlha e le ngoe ho lehe (1-0).

Ka hona LDF e shashariloe lipapaling tse tharo ka tatellano ha ho kenyeletsoa le ena ea sehlopha sa LMPS ea ka Moqebelo o fitileng.

___________________________________________________________________________

Papatso

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this:
search previous next tag category expand menu location phone mail time cart zoom edit close