Le ha sehlopha sa bahlankana sa Lesotho sa handball se ne se sa itlhophisa hantle empa se tloebile sa Eswatini ka lintlha tse 27 ho tse supileng (27-7) papaling ea pele kajeno.
Lipapali tsena tsa Zone 6 tse tsoelang pele Zimbabwe sehlopha sa ba ka tlaase ho lilemo tse 20 se sebelitse ka thata ho hapela Basotho tlholo.
Hoea ka mokoetlisi oa sehlopha sena monghali Limpho Tshabalala o boletse hore le ha ba sa koetla hantle bahlankana ba sebelitse ho latela litaelo tseo a ba fileng tsona.
“Libapali tsa heso li ile tsa phethisa litaelo tsaka, ‘me ke thabile ke hona”, ho bolela monghali Tshabalala.
A supa hore papaling e hlahlamang o tla fetola maoa e le hore a tsebe ho hlola hape.
A phethela ka ho kopa Basotho ho ba tšehetsa a bile a ba tšepisa hotla le khau ea khauta Zimbabwe ha ba khutlela hae.
Ho sa le joalo ha e le sehlopha sa ba ka tlaase ho lilemo tse 18 sona se shashariloe ka phafa ea 58 ho tse robong ke Zambia (58 -9).
Puisanong ea mokoetlisi oa sehlopha seo le moqolotsi oa Lesotho monghali Walter Nkopane monghali Mohlalefi Senohe o tobokelitse hore ba lekile le hoja ba ne ba bapala le sehlopha se matla sa Zambia.
A supa hore bahlankana ba ithutile tse ngata papaling eo, ke tšepo ea hae hore papaling e hlahlamang ba tla sebetsa hantle.
A re sehlopha sa Zambia se bile le nako e lekaneng ea ho koetla.
Monghali Senohe o hlalositse hore lipapali tsa hae li oele moea le ka morao ho hore sebapali se seng se fumane karete e khubelu sa tsoa ka lebaleng.
Ha e le sebapali se ipabotseng papaling ea ba ka tlase ho lilemo tse 20 Tholoana Phelane o hlalositse hore o tlohile Lesotho a na le tlholo ka pelong ea hae.
“Ke tlohile hae ke ikutloa hore ke koetlile ho lekana hore ke hapele Basotho Tlholo”, ho toboketsa Phelane.
A re o thabile haholo ke tlholo eo.
A toboketsa hore le ha ba sa fumana monyetla oa ho ikoetlisa ‘moho ha ba le hae empa ba tla sebetsa ka thata ho hapa papali e hlahlamang.
Hosane ka la 19 Mphalane lihlopha li tla nkhisetsana mahafi ka tsela e joana:
Ba ka tlaase ho lilemo tse 18 – Lesotho le Zimbabwe
Ba ka tlaase ho lilemo tse 20 – Zambia le Lesotho
Lesotho Sports Blizz 